Super Falcons
Babban Sakataren Hukumar Ƙwallon Ƙafa ta Nijeriya (NFF), Dakta Mohammed Sanusi, ya roƙi ‘yan Nijeriya mazauna Babban Birnin Tarayya Abuja da kewaye, da ma daga jihohin da ke maƙwabtaka da su da su fito da ɗimbin yawa zuwa Filin Wasa na MKO Abiola na Ƙasa da ke Abuja a ranar Juma’a don marawa Super Falcons baya a gasar neman gurbin shiga gasar cin kofin ƙwallon ƙafa ta mata na Afirka, wasan farko da Afrika ta Kudu.
Zakarun Nahiyar Afrika sau tara Nijeriya da zakarun Afrika ta Kudu da ke jan ragamar za su fafata a cikin katafaren filin wasanni na Nijeriya da misalin ƙarfe 5 na yammacin ranar Juma’a. Za a buga wasan na karo na biyu ne a filin wasa na Loftus Versfeld na Pretoria ranar Talata mako mai zuwa.
“Hukumar ta NFF tana kira ga ‘yan Nijeriya daga ko’ina a cikin Babban Birnin Tarayya da jihohin da ke maƙwabtaka da su, da ma daga ko’ina cikin Nijeriya da su fito cikin dubun dubatar su domin ƙarfafawa Super Falcons zuwa samun nasara a wasan su da Afrika ta Kudu.
“Wannan babban wasa ne ta kowane ma’auni. Muna kira na musamman ga mutanenmu da su zo da ɗimbin yawa su goyi bayan Super Falcons. Yana da muhimmanci a gare mu mu sami babbar nasara a nan domin mu kasance cikin matsayi mai kyau kafin mu tashi zuwa Afirka ta Kudu. Nasarar mai kyau a nan za ta ƙarfafa matanmu da ƙwarin gwiwa da tunanin da za mu yi nasara a Pretoria,” inji Sanusi.
Nijeriya ba ta shiga gasar ƙwallon ƙafa ta mata ta Olympics tun shekarar 2008 ba, lokacin da Falcons ta yi rashin nasara a dukkan wasanni ukun da ta buga a rukunin a China.
Kyaftin Rasheedat Ajibade ta faɗa a ranar Laraba cewa muradin babbar tawagar mata ta Afirka, Falcons, bai canza ba tun farkon wasannin cancanta.
“Tun lokacin da muka buga da Habasha, mun himmatu wajen ganin an kammala wannan jerin wasannin cancantar. Burinmu koyaushe shine mu sami damar shiga gasar Olympics. Yawancin mu har yanzu ba mu buga gasar Olympics ba kuma lamari ne mai girma a gare mu. Muna so mu kasance a can a Paris.
“Akwai lamurra biyu da Super Falcons ya kamata su warware tare da Banyana Banyana, da gaske. Duk da haka, wannan ba shine dalili ba a wannan lokacin. Manufar ita ce cancantar shiga gasar Olympics.”
Nijeriya ta zama ta ɗaya a nahiyar Afirka a Gasar Cin Kofin Duniya ta Mata ta FIFA da aka yi a Australia da New Zealand watanni takwas da suka gabata, ba tare da an doke su ba a lokacin da aka ƙayyade, kafin daga bisani Ingila ta doke su a bugun daga kai sai mai tsaron gida.
Tawagar Banyana Banyana ta isa Nijeriya ranar Lahadi.
A cikin Camp:
Masu tsaron gida: Chiamaka Nnadozie, Tochukwu Oluehi, Linda Jiwuaku
Masu tsaron baya: Jumoke Alani, Osinachi Ohale, Chidinma Okeke, Shukurat Oladipo, Michelle Alozie, Nicole Payne
‘Yan wasan tsakiya: Rasheedat Ajibade, Toni Payne, Deborah Abiodun, Jennifer Echegini, Christy Ucheibe, Halimatu Ayinde
‘Yan wasan gaba: Uchenna Kanu, Gift Monday, Omorinsola Babajide, Ifeoma Onumonu, Esther Okoronkwo, Chiwendu Ihezuo
