Dakarun Haɗin Gwiwa na Rundunar Sojojin Nijeriya, Operation Hadarin Daji (OPHD) a yankin Arewa maso Yamma, sun kashe ‘yan bindiga 12, tare da ƙwato makamai, da suka haɗa da bindiga ƙirar AK-47, da harsashi ɗaya da zagaye biyu na 7.62mm da shanu 18.
Jami’in Yaɗa Labarai na rundunar, Laftanar Suleman Omale, ya bayyana hakan a wata sanarwa da ya raba wa manema labarai a Gusau ranar Asabar.
Omale ya ce nasarar da aka samu ya biyo bayan ci gaba da kai hare-hare kan masu tsatsauran ra’ayi don dawo da zaman lafiya a yankin Arewa maso Yamma.
Ya ce sojojin sun samu nasarar mamaye al’ummomin Babban Doka, Gobirawar Challi da Kabaro a ƙarƙashin ƙaramar hukumar Maru a jihar inda suka yi artabu da ‘yan ta’addan a wata babbar musayar wuta a ranar Juma’a.
“A yayin farmakin sojojin mu na yankin Dansadau sun nuna jarumtaka, inda suka yi galaba a kan ‘yan ta’addan tare da kashe ‘yan ta’adda 12, yayin da wasu suka gudu da raunukan harbin bindiga.
“A cikin wani yunƙuri na baya-bayan nan, sojojin sun ƙwato manyan makamai da kadarori daga wurin, ciki har da bindiga AK-47 guda 1, harsashi 1, alburusai 2 na musamman 7.62mm, da bindigar gida 1.
“Bugu da ƙari, sojojin sun kuma ƙwato shanu 18, babura 10 na ‘yan ta’addan tare da lalata su nan take,” inji shi.
Omale ya ce Kwamandan 1 Brigade da Sashen 1 OPHD, Birgediya Janar Sani Ahmed ya yaba da jajircewa da ƙarfin halin da sojojin suka nuna a lokacin aikin.
“Bari in yi kira ga sojojin da su ci gaba da gudanar da ayyukansu kuma kada su yi ƙasa a gwiwa har sai an daidaita al’amura a yankin,” inji Ahmed.
