Wasu da ake zargin ’yan fashi ne sun lalata wani layin da ake kira High Tension Transmission ta hanyar amfani da na’urori masu fashewa a Unguwar Kanawa da ke wajen babban birnin jihar Bauchi.
Tashar wutar da ta ratsa ta Bauchi, tana ba da wutar lantarki ga sauran jihohin Arewa maso Gabas.
Mazauna unguwar sun ba da rahoton jin wata katuwar kara a tsakar gida inda daga bisani suka gano cewa an ruguza na’urar ne mai suna High Tension Mast.
Kakakin rundunar ‘yan sandan jihar Bauchi, Ahmed Mohammed Wakil, da yake tabbatar da faruwar lamarin,
ya ce rundunar ta samu rahoton faruwar lamarin ne daga babban jami’in tsaro na kwalejin fasaha ta tarayya ta jihar Bauchi.
SP, Wakil ya bayyana cewar ” An tsara, an Kuma shirya Tawagar jami’an ‘yan sanda, da suka hada da kwararrun ma’aikata na sashen tarwatsa abubuwan fashewar sinadarai na Radiyo da Nukiliya (EOD-CBRN), an tura su wurin da lamarin ya faru nan take.”
“Saboda haka, bincike na farko ya nuna cewa wata igiya mai suna High Tension ce ta rushe, kuma ta lalace sakamakon bama-baman da ake zargin barayin tattalin arziki ne suka yi amfani da su. Bugu da ƙari, an killace yankin tare da share fashe-fashe da sinadarai na Radiyon Radiyo da Nukiliya (EOD-CBRN) ,” in ji shi.
Wakil ya kara da cewa an gano wasu ragowar abubuwan fashewar a wurin.
Ya Kara da cewa, ana ci gaba da gudanar da sahihin bincike a kan lamarin domin ganin an cafke wadanda suka aikata laifin tare da gurfanar da su a gaban kuliya.
